今個星期繼續由 王鎮泉 Jeoffrey 為觀眾送上電影資訊，今集節目邀請到喺《寒戰1994》主演劉俊謙以及導演梁樂民訪談，分享拍攝電影時嘅點點滴滴。
今次劉俊謙飾梁家輝嘅角色「青年版李文彬」，梁樂民就話，阿謙係個有情有義、好細心嘅人，呢一部分就係同李文彬呢個角色好相似嘅地方。家輝哥將李文彬演得入型入格，喺觀眾心中已經有一個印象，而阿謙嘅青年版就會好唔一樣。阿謙就話，佢同導演討論時，角色本身內在特質係有保留同承傳，至於外在形象就可以同第一、二部唔同。因為故事時間發生喺1994年，形象可以好唔一樣，亦係一個創作空間。
電影雲集強勁陣容，包括《權力遊戲》、《唐頓莊園》演員：Aidan Gillen、Hugh Bonneville。梁樂民大讚兩位國外演員演技精湛，而且可以帶出自然生活感，令表演似真正發生。阿謙就以「行雲流水」形容同兩位嘅對戲，因為兩位台詞量好大，演員要處理長台詞係好考功力，但兩位真係做到好似傾偈咁，加上會有生活化小動作，令一切更生活化。阿謙雖然有連串英文對白，不過佢就冇壓力，事關佢話唔會逼自己講英式英文，加上角色係香港警司，所以佢容許自己有港式英文。
本周電影新片速遞
《寒戰1994》：
2017年，新一屆保安局局長候選人李文彬突然失蹤，為此，警務處處長劉傑向資深大律師簡奧偉尋求協助，開啟咗一份1994年嘅神秘檔案，追溯到回歸前夕，政治部即將解散，一宗富商綁架案，令熱血正義嘅李文彬同冷血野心家蔡元祺，喺警界掀起一場暗潮湧動嘅權力較量。香港亦迎嚟新一輪權力洗牌。
《穿PRADA的惡魔2》：
傳統雜誌日漸式微， 奄尖聲悶、mean爆惡頂上司裴美蘭亦要向現實低頭！當年任勞任怨嘅助理艾美莉如今已華麗升呢成為國際品牌集團嘅高級主管，更手握大權，擁有裴美蘭迫切需要嘅廣告收入……而裴美蘭當年另一名助理沙安蒂究竟是敵是友？佢又會唔會否出手相助，幫忙挽救裴美蘭嘅事業？
本周票房龍虎榜：
截至4月29日中午，第1位 《米高積遜》；第2位 《夜王》；第3位 《我們不是什麼》
