熱播劇《正義女神》大結局將於今晚（5月1日）八點半喺翡翠台播出，全城熱切關注究竟高成彬能否被繩之於法，陳煒飾演嘅高淑樺又點樣面對此事。喺大結局前夕，高大狀決定先為好友何國鉦慶祝生日。
生日嘅主人翁何國鉦分享生日飯局嘅相片，笑指周國豐問佢近日會否見得太多，因為今個月已經切咗三個蛋糕，Dorian話：「鬼叫你同我生日差幾日，而我哋又有咁多共同朋友咩！琴晚（4月30日）好開心有我兩個培正兄弟William同Clayton，婉婉師妹，仲有肥媽、Rita老師、樂小姐、米羔、近期熱爆嘅高淑樺煒哥（大家今晚記得睇正義女神大結局呀），同埋好錫我嘅Ta姐、Jenny同Christy一齊食飯。」
Dorian仲笑言身邊啲人見佢經常同中聲家族嘅人聚會，向佢打聽可唔可以介紹去參加中年好聲音，「我想話你知個答案係『絕對唔可以』，因為周Sir知道會係第一個叮走你，再次感謝大家嘅生日祝福同禮物，Love you」。
