草蜢紅館騷嚟到第四場，請到同佢哋合作超過20年嘅經理人林珊珊做嘉賓，已經有20年冇踏上舞台公開演唱嘅珊珊，演繹40年前嘅經典曲，勾起無數人嘅青春回憶。珊珊一人登台，但全家出動，包括父母、兩個囡囡、細佬林曉峰、好友鄭丹瑞現身撐場，鄭伊健仲喺後台親自護送珊珊上台，另外來捧場嘅仲有容祖兒、蔡卓妍、關智斌等。
草蜢三子為咗答謝珊珊，特登準備「金哨子」作為禮物，蔡一智話「呢個唔係『銀雞』係『金雞』，金雞獨立，你一吹，我哋三個即到，可以指揮我哋！」轉數快嘅珊珊話：「如果係足金就更好，依家金價好吖嘛！」
珊珊又對住阿蔡一傑講：「我哋度過二十幾歲、三十幾歲，估唔到今日我哋度過五十幾歲，（指住阿智）我哋六十幾歲，樂悠咭代表。（對蘇志威）你仲有幾日都樂悠咭喎！」
