陳展鵬、單文柔Phoebe、關嘉敏、梁敏巧Maggie、林漪娸同王馨平呢日現身一個周年晚宴活動，大會仲為同屬4月19號生日嘅Phoebe同漪娸姐補祝生日，而煎Pan呢個寵妻之人早前就夾埋囡囡小豬比一齊炮製驚喜，令Phoebe相當感動。
煎Pan早前喺社交平台轉發咗條片，仲留言話「我老婆球技好，你都唔使咁扯佢，唔好俾我撞到你，我實扯爆你」，由於條片已被刪除，唔少網民都睇唔到，所以對煎Pan講嘅嘢一頭霧水，呢日佢就親自解話，指有一位足球員嘅譯音名同佢太太係一樣，所以佢先轉發呢條片嚟幽默一下。
《女神配對計劃2》早前公佈咗五位參加嘅女神名單，唔少網民都期待關嘉敏會以神秘女神身份現身，不過呢日就話知節目組搵緊邊類型女仔，佢仲保證個個都係高質素嘅，但有冇佢份就大賣關子。
同屬女神嘅Maggie，日前就喺社交平台分享咗輯街頭靚相，有網民發現佢相中拎住嘅手袋價值不非，仲有人估係律師Matt所送嘅，呢日佢就解釋個袋去年已經孭過，加上自己入行咁多年，買個袋都好簡單啫。
唔少歌迷期待王馨平再出歌，佢就話最近自己加重咗教瑜伽嘅時間，暫時工作都放喺瑜伽導師上，不過自己仲好鍾意唱歌，所以唔會放棄歌手身份。
保養得宜嘅林漪娸被封凍齡美人，講起早前好友為佢慶祝生日，林漪娸就話大家嘅狀況都好好，又指隨年齡增長，最重要係大家都身體健康開開心心呀。
