陳庭欣Toby 關楚耀Kelvin 陳家樂 同魔術師 甄澤權LouisYan 一齊現身活動，宣傳健康飲食習慣。阿關經營嘅Pickleball生意有聲有色，稍後仲會開分店，Toby都係捧場客之一，單身嘅佢坦言希望喺球場上結識到新對象，仲叫阿關做媒人識多啲朋友，又大讚球場上好多高質男士，樂意交朋結友。
日前喺 陳家樂 同 連詩雅Shiga 結婚3周年紀念，兩夫妻同步出Post曬恩愛，家樂仲附上一張Shiga手繪心意卡話笑到收唔到聲，因為張卡係一個電子品牌嘅用品，驟眼睇令家樂信以為真，家樂甜笑指老婆時常都會搞呢啲小心思，令佢好開心，相反家樂本人就自愧冇咩儀式感去氹老婆。
LouisYan成為首位華人魔術師登上紅館開騷，現時一切籌備當中，令佢心興奮又緊張難以形容，Louis仲預告除咗精彩演出之外，仲有一幕驚人項目送俾觀眾，過往曾經有魔術師為演出而送命，至於係啲咩就賣關子先。另一方面佢亦有意邀請曾合作《街頭魔法王》嘅主持吳若希Jinny、林盛斌Bob等合體同觀眾見面。
