江美儀率型男小生周嘉洛、曾展望、朱敏瀚（朱仔）及吳業坤（坤哥）主持嘅TVB綜藝節目《試真Ｄ》，「北上實測」各種平價團購美食與住宿，不論好壞都敢言敢試，當中惠州「7 餸海鮮餐」打假事件最轟動，江美儀直接向黑店開火，其後官方火速介入，將涉事嘅海鮮餐廳掛上黃牌警告並勒令停業整頓。
主持北上覓食拍攝，回港後依然保持緊密聯繫，《試真Ｄ》十五集已播完，江美儀喺社交平台分享佢哋工作照之外，仲感謝觀眾不離不棄嘅支持，同時多謝陪佢一齊去經歷左咁多嘅所有兄弟姊妹，尤其係四位小鮮肉😍。
江美儀坦言拍呢個節目時，眾人承受唔同嘅壓力，起初好擔心節目成唔成功，亦收到好多唔同嘅聲音，「我相信只要大家做好自己，保持正能量，享受過程，咁就已經夠啦」。
江美儀更逐一多謝四位小鮮肉，「多謝嘉洛你成日氹我引我笑🤣 多謝朱仔你嘅淡定令我好放心🥰 多謝坤哥你俾我見到你感性反叛嘅一面🤭 多謝GM你嘅童真帶領節目快樂氣氛🥳 」，江美儀希望節目有機會原班人馬拍第二季，並寫道：「當然要多謝大家呢三個星期陪住我哋不離不棄！❤️ 希望好快我哋原班人馬會同大家繼續『試真D』。」
雖然節目播出後，有人批評係「斷人衣食」、評論過於尖銳、有人質疑節目「做假」等，江美儀都真誠回應表示，實話實說去反映真實情況，目的係希望改善旅遊環境，拍攝節目前，亦要求製作團隊必須「試真嘢」，拒絕弄虛作假，此舉都收穫唔少好評，除咗去一啲唔好食兼試伏嘅餐廳，仲有好好味嘅嘢，難怪唔少觀眾嫌15集太少，希望快啲有第二輯。
