草蜢演唱會噚晚喺紅館舉行第5場，鄭伊健、鄺美雲、谷德昭、鍾鎮濤、溫碧霞及肥媽等捧場，與全場觀眾玩人浪、起身跳舞大合唱，玩得好High。噚晚表演嘉賓軟硬天師復刻「草蜢森巴大戰軟硬Fans演唱會 2012 GHVSSH」，更以20年前一黃一紅戰士ook登場，掀起集體回憶。
當年12場對決後軟硬險勝，前晚佢哋再戰紅館，軟硬將草蜢《三分鐘放縱》加入首本名曲《老人院》、《廣播道fans殺人事件》及《川保久齡大戰山本耀司》歌詞，好有心思，但蔡一傑「投訴」佢哋雙腳無離地跳舞揸流攤，蔡一智更取笑佢哋跳「落地生根舞」，林海峰稱佢哋係「無跳組合」，而草蜢跳唱軟硬嘅《叱咤勁歌金曲》迎戰，按老規矩以現場歡呼聲評分，雖然主場草蜢明顯大勝，但軟硬出茅招亂噏賽果，非常爆笑。
草蜢送上泳褲畀林海峰，預祝佢三項鐵人比賽成功，又向葛民輝送孖煙囪底褲。林海峰爆小秘密，原來1993年軟硬宣傳《廣播道fans殺人事件》時潮爆板仔look，其實係抄草蜢《三分鐘放縱》MV造型，「睇電視見到，嘩，咁型，但唔襯你哋囉！我即刻叫阿葛跟住搵」，結果獲當年板仔界鉅子贊助，軟硬成為潮流指標，林海峰多謝草蜢啟發，揚言任何時候要「大戰」，軟硬隨時奉陪，台下Fans立即歡呼，期待草蜢再乘軟硬開騷。
軟硬一唱一和，將近日草蜢三子喺演唱會台上講嘅深情說話，重新組裝成軟硬模式，全場笑聲不絕。林海峰話：「你哋三個話希望下一世都做兄弟，點解冇預我哋兩個？如果唔預埋我哋，就冇辦法同你哋『大戰』！」林海峰又對傑仔講：「人生嚟到呢個地方，要將張畫紙畫到最靚。」葛民輝扮傑仔語氣：「如果軟硬有張畫紙，一定請埋草蜢一齊畫！」傑仔就話張畫紙一定有軟硬份，可見佢哋友情深厚。
蔡一智台上多謝舊同學蘇志威，林海峰亦多謝同學葛民輝，二人喺屋邨大，冇諗過呢個組合可以堅持到40年，當蘇志威質疑有40年咩，葛民輝解釋：「四捨五入！雖然我哋兩兄弟成日吵吵鬧鬧，但係我哋永遠都係一體！」林海峰拉住傑仔講：「將來無論你哋三個邊個走先（草蜢齊聲『啋』），我都會走先，因為我慣咗早瞓。如果草蜢下一世有場紙嘅話（紅館開騷入場紙），我哋軟硬下一世都會做兄弟，陪你哋繼續玩落去！」五子手搭手結盟，場面感人，接住佢哋合唱草蜢《朋友》及軟硬《好兄弟》混合版，全場High爆！
