劇集《正義女神》圓滿落幕，一眾演員佘詩曼、陳煒、譚耀文 、周嘉洛、戴祖儀、馬貫東等，仲有劇集總監製鍾澍佳喺大結局呢晚，同台前幕後工作人員一齊睇大結局向觀眾送彩蛋。佳導表示今次觀眾反應熱烈，意想不到會重掀煲劇潮，仲經常喺街上被問劇情進展，搞到佢都有啲尷尬。
劉倬昕 飾演嘅高城彬變態殺人罪行逐一被撕破，最後仲由媽媽高淑華大義滅親，陳煒同劉倬昕呢對母子嘅場面睇得觀眾肉緊又悲傷。言官佘詩曼喺最後呢幾集同陳煒交鋒嘅戲有連場精警對白，加上七情上面嘅演釋獲觀眾大讚。
煒哥坦言最尾一集戲嘅情感演繹有難度，因為既係律師又係高成彬媽媽，仲要親手揭破阿仔惡行，一啲都唔容易，而最後一人喺法庭上獲言官佘詩曼深情問候，即令佢爆喊。阿佘今次夥拍眾多新眾演員合作，給予唔少鼓勵，見到劇集出得後得到咁好反應同埋被認同，佢都好戥一班年青演員開心。
劉倬昕呢日特意著咗件自製囚犯衫現身呼應劇情，仲帶返第一集已經出現，而且同案情好有關鍵嘅公仔嚟，非常之有心思。陳若思 近日因為宣傳劇集，每星期都會同劉倬昕仲有 馮皓揚 拍片，隨住劇集大結局令佢好不捨，不過Amber好快就會喺真人騷《女神配對計劃2》同觀眾見面，馮皓揚笑言身高未逹標參加，真係可惜。
劇集由開播到結局都錄得升幅成績，呢頭大結局，嗰頭已經有網民期待原班人馬再開續集，煒哥就親口證實佳導曾透露有高淑樺前傳，但詳情有待公布。傳聞羅家良會加入其中，煒哥聽到後又興奮又期待，至於譚耀文亦盼望有機會再同兩位女神阿佘同煒哥合作。
