由16名練習生於緊迫時間下受訓爭取脫穎而出嘅《魔音女團》，今晚起就會同大家見面，節目由經驗豐富嘅「班主任」 陳潔靈 陳奐仁 率領，務求將一眾練習生脫胎換骨，成為女團成員。
加上助教 冼靖峰 黃洛妍 同 文佐匡 嘅全天候支援，仲有來自韓國嘅偶像學院老師Yong Heo以及編舞老師Geon同Lenna T.指導，務求令佢哋由五音不全到學識唱歌、改善走音、跳出活力十足嘅誘人舞步。加上造型同美妝指導 馬天佑、Kev Yiu、Carrie Cammy等，為16位練習生改頭換面，散發佢哋嘅獨特魅力。
節目公開火藥味十足嘅預告片，揭示練習生們由「零」進化成為歌舞全能嘅偶像過程。預告中可見練習生接受高強度體能同舞蹈特訓，有人練到「斷片」崩潰，亦有人於高壓下展現出不服輸嘅「豪放」本色。
預告後半部畫風一轉，練習生換上純白金邊軍裝式團服、喺強勁燈光映照舞台下演出，顏值與實力兼具，令人期待。
《魔音女團》5月4號起 逢星期一至五晚 22:30 翡翠台