蕭正楠 同 黃翠如 最近真係各有各忙，阿蕭忙住喺內地開演唱會，而翠如就正同洪永城喺外地拍攝緊《走過歷史大地》。兩公婆雖然分隔兩地，但係幾忙都好彼此都心繫對方，好似剛過去嘅星期六阿蕭喺中山開騷，翠如雖然嚟唔到，但係出名愛妻號嘅阿蕭，都特登喺個唱上唱咗首《天下無雙》俾太太，兼喺大屏幕上播放一家三口嘅温馨照片，sweet爆全場，阿蕭仲隔空同全場講：「送俾你黃翠如，快啲返呀，因為阿仔等緊你呀﹗」
而其實翠如臨出發飛前，已預先同阿仔蕭哈哈錄好片段俾阿蕭，仲喺個唱上突然驚喜播出，片中所見，蕭哈哈不停叫住「爸爸﹗爸爸」，然後翠如就同哈哈講：「今日係爸B開show呀﹗」被驚喜到嘅阿蕭一臉疑惑咁問：「點解會有呢段片嘅？」明顯呢個環節，係翠如臨時加插送比老公架！
片中翠如又指自己因為喺外地工作，無法到場支持，所以只好隔空向阿蕭深情告白：「我都會支持你，I Love You﹗」仲叫大家多啲支持阿蕭，因為佢話老公今次有啲Lonely呀﹗
之後翠如就送上一段蕭哈哈四個月大時，聽爸爸自彈自唱《陪著你走》嘅片段，翠如仲形容哈哈係「全宇宙最愛你嘅粉絲」。冧爆嘅阿蕭即刻話好掛住阿仔，仲話自己上中山開show，好彩有阿媽、阿姨、舅母總動員幫手湊蕭哈哈，所以演出後佢就會即刻返去陪阿仔喇。
而家正喺倫敦嘅翠如，亦都有喺社交平台update自己嘅動態，佢仲上載咗一段喺街頭同蕭哈哈視像對話嘅片段，真係隔住個mon都feel到翠如有幾掛住哈哈呀﹗