草蜢嘅紅館演唱會於2號晚嚟到第6場演出，呢晚吸引到陳奕迅與太太徐濠縈、鄺美雲、馮允謙、黃淑蔓、林恬兒、林孝賢、車婉婉同劉浩龍等捧場，而呢晚草蜢更請嚟張學友擔任表演嘉賓。
蔡一智表示學友曾擔任草蜢25周年演唱會嘅嘉賓，所以今次40周年再邀請到對方別具意義，佢話：「自從我哋師傅（梅艷芳）走咗，我哋視學友為長輩，有咩都會去問佢。」而學友則笑言：「我本來唔戴眼鏡上台嘅，草蜢好似食咗防腐劑，出場前台下啲人叫我最好戴返副眼鏡，遮吓啲皺紋、眼袋，睇起上嚟夾啲！」引得全場爆笑。
阿智又指學友一直有個「迷思」，就係佢同草蜢邊個係前輩，阿智指學友成日都話係草蜢先出道，但佢就指草蜢參加完新秀後，自己去參加19區歌唱比賽時曾唱過學友嘅歌。蘇志威就指草蜢係85年參加新秀，同年跟梅姐踏上紅館演出；而學友就自爆係83年參加新秀但無入圍，翌年參加歌唱比賽，再喺85年出唱片。
之後佢哋又提到林珊珊，學友話上網睇到對方唱《再見Puppy Love》，突然令佢覺得後生咗：「好耐冇試過回春嘅感覺，佢係我覺得最正嘅嘉賓。」學友又指草蜢無論大騷細騷、有騷冇騷都一齊40年，令佢相當佩服：「我自己一個人唱40年唔使理人好易，但你哋三個一齊40年真係好難，唔係講笑，衷心佩服！」之後阿智又拎出一支寫住「學友兄，你是我們唯一傳奇。智、威、傑上」嘅錦旗送畀學友。
而喺完騷後，阿智、傑仔、經理人林珊珊同演唱會監製家萍等團隊，喺紅館後台為5月3日生日、正式「登六」嘅蘇志威倒數慶祝生日，踏入零時零分大合唱生日歌，非常熱鬧。太太劉小慧與兩個囡囡Yumi和Ina則送上擁抱，蘇志威揚言：「聽日尾場，我會落足200%力表演，慶祝我60大壽！」
