羅啟豪 同 譚輝智 作客《StarTalk》接受主播 許文軒訪問，兩位靚聲之人將會聯手喺紅館開騷，啟豪同輝智都話完全諗都無諗過，輝智話佢反而有諗過自己成為運動員多過成為一位歌手，所以當得悉自己同啟豪真係有機會踏上紅館台板，輝智都曾經質疑究竟可唔可以成事？壓唔壓得住紅館呢個場？心裡充滿憂慮。
兩人不謀而合之處除咗係佢哋嘅家人同樣熱愛唱歌之外，兩位嘅家底亦被指雄厚，啟豪話佢必須要澄清自己並非外界所指靠屋企，反而係佢靠自己努力去達成而家擁有嘅嘢，家人並無任何參與。而輝智認同自己係靠屋企養大，但而家始终都要靠自己努力去得到觀眾認同，所以做好自己係最重要。
為咗呈現最Fit狀態，啟豪呢排都努力做gym戒食煎炸食物，啟豪同輝智仲即場量度「老鼠仔」同胸肌，輝智話話自己唔可以太大隻，否則會成個筋肉人咁，所以主力係瘦返少少就達標，佢仲講笑話同自己嘅健身教練失聯。
