劉俊謙 同新戲《寒戰1994》導演 梁樂民 接受主播 王鎮泉 訪問，分享拍攝點滴。講到戲中一場電單車戲份，劉俊謙飾演嘅李文彬同 王丹妮駕駛電單車風馳電掣逃避追殺，刺激萬分！劉俊謙表示拍呢場戲睇就好玩，但真係拍落都幾艱難，佢話其中有一個動作要凌空跳落草地，就真係好考佢技術。
喺戲中觀眾亦可以感受到1994嘅香港係點，喺還原場景方面，導演都落咗唔少功夫，因為香港真係變化好大，所以佢話美術部都盡全力去還原當年面貎，講到最神似嘅一個場景就係啟德機場，導演表示因為唔喺原址拍攝，所以係好靠劉俊謙同其他演員們嘅想像力去完成戲份。 
本周電影新片速遞
《寒戰1994》：2017年，新一屆保安局局長候選人李文彬突然失蹤，為此，警務處處長劉傑向資深大律師簡奧偉尋求協助，打開咗一份1994年嘅神秘檔案，追溯到回歸前夕，政治部即將解散，一宗富商綁架案，令熱血正義嘅李文彬同冷血野心家蔡元祺，喺警界掀起一場暗潮湧動嘅權力較量。香港亦迎嚟新一輪權力洗牌。
《穿PRADA的惡魔2》：傳統雜誌日漸式微， 奄尖聲悶、mean爆惡頂上司裴美蘭亦要向現實低頭！當年任勞任怨嘅助理艾美莉如今已華麗升呢成為國際品牌集團嘅高級主管，更手握大權，擁有裴美蘭迫切需要嘅廣告收入……而裴美蘭當年另一名助理沙安蒂究竟是敵是友？佢又會唔會否出手相助，幫忙挽救裴美蘭嘅事業？
