英皇娛樂近日舉行成立25周年演唱會，星期日晚有份演出嘅張敬軒，今日突然透過公司宣佈因「急性內耳迷路炎」，而將缺席今晚演出。
昨晚張敬軒與公司同事TWINS、容祖兒、李克勤、陳偉霆、李幸倪等先後現身演出，佢喺台上表現依然維持一貫高水準，亦一直面帶笑笑。不過據報軒仔表演結束後就隨即感到身體不適，隨即被送往醫院急症室。
英皇娛樂今日發聲明，證實軒仔已確診「急性內耳迷路炎」，醫生診斷後囑咐必須休養。因此今晚第2場演出，張敬軒演出環節將取消。英皇強調為藝人健康同確保演出質素而作出決定，今晚其他藝人演出會如期舉行。
「急性內耳迷路炎」通常由病毒感染引起，可能由普通感冒、流感、皰疹病毒繼發，亦有可能因慢性中耳炎或腦膜炎嘅細菌感染導致，據指極度壓力下亦有可能誘發。病者可能會有嚴重眩暈、聽力障礙同平衡失調等病徵出現。
