舞蹈員李啟言 (阿Mo）2022年7月於紅館一場演唱會舉行期間，被懸掛半空嘅屏幕下墜擊中脊椎，導致嚴重受傷，法庭早前已裁定阿Mo可獲賠償，而4號再次開庭評核賠償金額，阿Mo由母親陪同下以視像形式作供。
精神不俗嘅阿Mo，對答流暢清晰，期間佢提到自己受傷前每月平均收入約6.3萬港元，但受傷至今仍於醫院接受治療，日常亦需由他人照顧。
由於父親 李盛林牧師 早前離世，過往由李牧師所寫嘅代禱信，已改由家人代筆，當中亦提及阿Mo嘅哥哥同姐姐心聲。
身為李家長子嘅哥哥，於信中指自己係唔太識表達自己情緒嘅人，以前爸爸都會花心思將時間畀晒佢哋，所以從來唔覺爸爸有咁多事情要做：「到佢走咗⋯先知原來佢呢個血肉之軀所建成嘅堤霸係幫我地(哋)擋咗幾多嘅洪水⋯」
女兒則於信中提到正於家中收拾，每件物件都勾起同爸爸嘅美好回憶，諗起爸爸為每位家人送上嘅溫暖，又細心了解佢哋嘅需要：「想起摩西俾神接走，覺得天父好似唔想爸爸受太多既(嘅)苦，所以好快就接走爸爸」，兩子女又指於爸爸離開後，要喺短短幾日內，承擔起對方所留下嘅工作，先知道爸爸原來一直承擔起人所不能作嘅海量事務。
面對爸爸離世嘅哀慟，同時又要接棒承擔照顧細佬阿Mo嘅長期重任，令佢哋知道所承受嘅壓力係極其巨大且多面同多層次嘅。而信尾更提到李媽媽嘅身體狀況同胃口令人擔憂，所以特別為李媽媽禱告，祈求保守家人嘅健康。