警匪系列前傳新作，5月1號公眾假期上畫，星光熠熠陣容、加上權鬥劇情與連場火爆場面，憑藉極強口碑，開畫首日即衝破600萬票房，成功打破兩部前作紀錄，截至星期日，累積總票房更已火速衝擊1500萬。
前傳除警權暗戰，商界豪門家族恩怨亦係一大焦點。出爐香港舞台劇劇帝 謝君豪 飾演香港首富氣場懾人；佢同飾演其長子嘅 吳慷仁 父子對立，花絮更曝光戲中謝君豪因長子敗壞家聲而狠摑對方，仲怒斥「畜生不如」。
豪哥事後分享：「第一吓打落去真係好響！雖然無忍手，但其實好怕打到佢耳仔驚佢會聾。」專業嘅吳慷仁事後需敷冰，仲笑言「收音師應該好鍾意呢下聲」，兩人仲隨即進入狀態拍第二 Take。豪哥前後一共摑足慷仁十幾巴，兩位好戲之人Cut機後情緒依然激動，既抹眼淚又相擁平伏。 豪哥嘅造型每次拍攝前後都要花兩個多小時上妝落妝，戴頭套之外仲要加上人造皮膚，令佢話化妝後「塊面有種被針㓤嘅感覺」。逼真化妝更令「十妹」 廖子妤 都大為讚嘆，吳慷仁亦分享，首次見面圍讀時，豪哥已敬業帶妝上陣，仲覺得對方嘅鼻同自己頗有「父子相」。
一眾演員為配合新片宣傳，仲先後於社交平台上載自己1994年時嘅珍貴舊相， 劉俊謙 廖子妤 吳彥祖 郭富城 謝君豪 高海寧 等都齊齊公開絕密相片，引來網友熱烈討論。
