男團草蜢出道40周年舉行七場紅館演唱會喺5月3號圓滿成功，尾場草蜢三度encore反應熱烈，吸引唔少圈中藝人到場支持，歌神張學友擔任第6場嘉賓，尾場壓軸亦係天王級嘉賓郭富城。
城城與草蜢大騷舞技跳唱《失戀》及《唱這歌》，四子一齊做經典單腳企招牌甫士，城城仲自創最潮口號及動作「聽我講，一齊企硬撐草蜢」，全場觀眾high爆。
5月3號係蘇志威「登六」生日，獲萬人合唱生日歌，蘇志威感謝兩位兄弟蔡一傑同蔡一智領唱，仲笑稱夠歲數拎樂悠咭而感到自豪，蘇志威就話：「我覺得我攞呢張『樂悠咭』無愧，因為我哋係香港仔，三個喺屋邨打出嚟嘅香港三人組合，為香港音樂圈40年做咗好多嘢，我值得。」
