太極樂隊40周年演唱會，於全場觀眾大合唱《留住我吧》之下圓滿結束，演唱會上太極除咗同大家重溫歷年金曲外，許冠傑亦特別為佢哋寫咗首新歌《我願長伴你》，慶祝太極樂隊成立40周年，現場除咗播出Sam嘅自拍片段外，太極亦即場唱出呢首新歌。
不過講到最驚喜嘅，就係40年前《紅色跑車》嘅MV女主角 吳君如 ，現身演唱會現場擔任嘉賓，君如喺台上話自己拍呢個MV時只有19歲，而當佢到拍攝現場時，雷有輝就望住佢，眼神彷彿講緊「點解電視台派條咁嘅女畀我」，君如同雷有輝講：「我知你諗緊乜㗎，你就最好諗有邱淑貞啦、吳家麗啦、朱茵啦、劉嘉玲啦，又或者係李⋯⋯講得㗎下話？」聽到雷有輝叫佢講時，君如先講出「李麗珍」呢個名。
騷後問到雷有輝被君如將舊情史擺上枱講一事，雷有輝就話對方都講得好隱晦，佢又指已經係過去式，同時又指君如都有唔少舊情史，身邊啲拍檔鄧建明即讚雷有輝轉數高咗，大個仔喇。
成員Gary Tong雖然離開咗人世，但太極就話覺得故友有到場睇，仲分享佢哋綵排時唔見電話一事，佢哋覺得係Gary整蠱大家呀。
