內地唔少公園都有「相親角」，令一眾有意脫單嘅男女留低資料，合則相約，亦有唔少家長會帶自己仔女資料去即場招親，呢個特色地方都吸引過唔少網紅拍片。 楊玉梅 最近就喺社交平台分享佢去杭州出差時，去相親角搵男朋友嘅經歷喇。
士多啤梨以一身桃紅色長裙打扮現身相親角，而佢喺現場見到好多招親廣告都係90後嘅年輕人，即使見到一位66年嘅男士，對方要搵嘅都係70後嘅另一半，令已經花甲之年嘅佢都概嘆自己冇緣份，因年紀問題而屢屢碰壁。
不過亞姐出身嘅佢擁有美魔女外表，保養得宜之餘亦吸引唔少人向佢了解。有一位幫家人搵另一半嘅女士，得知楊玉梅年過60歲時，就忍唔住「嘩」一聲，仲讚佢似40幾歲，更留低佢聯絡方式。
不過楊玉梅揀對象亦有要求，佢話相親角唔少招親嘅男士年紀太細，而佢本人就列出擇偶8大條件，要真誠、有愛心、愛佢、有樓、身體健康、愛運動、年紀唔可以太細、仲一定要識提供情緒價值呀。
