唱片公司嘅大型演唱會嚟到尾場，旗下歌手繼續傾巢而出。作為大師兄嘅 謝霆鋒 一完成成都個唱就歸隊，以Chck爆造型壓軸登場，自彈自唱《逆行》，將氣氛推至最高潮。之後霆鋒再唱出《玉蝴蝶》、《非走不可》等情歌，令場館變成萬人K房。
不過演唱會Rundown原定會演繹嘅Medley歌曲環節竟然消失，事件更成為社交平台熱話。唱片公司完騷後霆鋒演出歌曲作出回應，表示外傳歌曲流程只係霆鋒嘅預備歌單，但因為霆鋒朝早先返港而未及綵排，所以等佢到場之後再選擇自己演出嘅歌曲。
作為大師姐嘅 容祖兒 就一改首場嘅慢歌演出，以紅色Bra top上陣熱唱《隆重登場》炸爆舞台。而Twins同 關智斌 繼續以黑金造型打頭陣，唱出《戀愛大過天》、《死性不改》、《眼紅館》。
Kenny頭場時帶領全場歌迷向阿Sa祝賀新婚快樂，呢日當阿Sa講起廿幾年來嘅成長點滴，自己17歲就簽入公司，Kenny就突然一句：「做埋人妻喇，嫁埋喇。」，阿嬌亦即刻講一句：「可喜可賀呀！」，令阿Sa冇咁好氣，反問係咪要日日提呢樣嘢？
古巨基 雖然抱病上陣，聲帶仍然未回復狀態，不過佢就搵咗洪助昇、黎展峯、曾傲棐以及黃明德四位師弟上台助唱，基仔亦多謝四位義無反顧特別練習新編的串燒歌。 
李克勤 就繼續用靚聲俘虜4萬名觀眾，用大家耳熟能詳嘅《紅日》勾起觀眾回憶。至於 李幸倪 泳兒 鄧小巧 許靖韻 四把靚聲同台合唱《企好》，不過令大家感受巨大震憾嘅就肯定係 海兒 展示巨肺女高音實力，演唱《L'amour est un oiseau rebelle》。
