林盛斌 王敏奕 羅子溢 張馳豪 等主演嘅新劇《警是個大佬》開拍咗一段時間，呢日拍攝一場被追殺嘅戲份，飾演黑幫大佬嘅阿Bob仲有Venus、子溢同 容天佑 一齊被困車廂場面驚險。劇中幾位都要應付大量動作戲，搞到個個都變身動作演員咁款，阿Bob笑言自己打起上嚟身形似足電影《殺破狼》中嘅大哥洪金寶，只欠留鬚同長頭髮掉玻璃樽。
Venus上演動作戲同時又要顧及情感演出，仲會同子溢發展一段耐人尋味嘅感情，挑戰打得又要喊得嘅演技，幾乎兩日一少喊、三日一大喊，喊完又要笑住投入下一場戲，獲阿Bob大讚好戲，仲笑佢流咗三公升眼淚，對手子溢則未擔心過，仲話Venus完全冇問題，好喊得。
Aska喺劇中要全天候保護阿Bob同屋企人，為咗做好打仔角色，事前仲專登跟師傅習武，不過子溢就唔太識欣賞，反而話Aska嘅動作有啲似古裝，令阿Bob即刻爆笑話有啲似楚留香，搞到Aska只好尷尬表示同師傅溝通錯誤。
近日阿Bob嘅大女林霏兒同二女林熹兒一齊去首映禮再次被網民批評，阿Bob話女兒當日係去見識吓玩吓嘅心態，傳媒朋友就提議佢哋做吓啲動作，其實都係一般年青人嘅態度，但就引嚟一啲批評，做爸爸當然好心痛，阿Bob再次哀求大家手下留情，有咩可以衝佢而來。
