過往於《阿爺廚房》霸氣十足嘅 李家鼎 近日因前妻 施明 離世一事而引發同長子 李泳漢 嘅不和 ，近日佢於施明後事辦妥後再次開炮，更似對泳漢完全心淡，狠斥對方狠批「搞風搞雨」，逐一數臭泳漢嘅「多宗罪」。
鼎爺爆料指，近7、8年來，大仔一家五口嘅開支基本上由佢一個人承擔，每個月起碼支付5萬蚊家用，包括孫仔嘅保險同學費都同樣承擔﹐又支付照顧施明同專門服侍大仔一家嘅兩名外傭薪金，但泳漢仲不時「苛索」，粗略估計已被索至少200萬。鼎爺感慨自己「手停口停」，又自責：「點解會養個咁嘅仔？」
鼎爺更踢爆泳泳漢稱於施明死後兩日通知父親，但鼎爺指出，大仔實際上於3月21日逝世後10日，有傳媒凌晨報導死訊前一刻先接獲通知。鼎爺更怒斥大仔夫婦「唔係人」，指於隱瞞死訊期間，仍以「支付施明醫療開支」為由向佢索錢，直至錢到手先告知噩耗。
鼎爺宣布已將所有財務與身後事交託予細仔泳豪，免得日後出現「偽造遺願」情況。佢仲表示施明已離世，自己再無顧慮，決定終止資助外傭同唔再供養長子一家，直言：「我唔想再見佢哋。」
之前一直有指施明唔鍾意細新抱Agnes，所以未有出席泳豪婚禮，而鼎爺就澄清呢個係「大話」，佢仲爆出親耳聽到泳漢恐嚇施明「你去（婚禮），我就打X死你！」令施明因為懂怕大仔脾氣，最後先未有出席細仔婚禮，造成終生遺憾。
報道又指鼎爺將矛頭指向大新抱Conny，指對方「人無三尺高，肚裏三把刀」，指控Conny搞是搞非、呷細新抱醋，間接導演家不成家。
而最令鼎爺怒火中燒嘅，係李泳漢喺亡母喪禮上依然執著，連花牌都堅持唔准細新抱Agnes署名，鼎爺直言對大仔徹底失望，甚至決定連「解穢酒」都唔去。「我唔知佢點解變到咁，可能我同施明以前太縱佢。」