勇奪馬來西亞史上最高票房恐怖中文電影嘅《蠱降》，5月28號就會喺香港上映，新片由泰國GL劇女神Kao，以及嚇鬼有一手嘅資深演員黑哥 姜皓文 同新加坡資深影星 李國煌 等演出，電影公司公佈咗影片海報同預告，當中佈滿蟲嘅頭骨已令人毛管直豎，預告一開場仲有一班小朋友喺課室中降頭倒地吐血掙扎，恐怖氣氛爆晒燈。
新片於馬來西亞上映後，被譽為係「降頭百科全書」，喺當地映僅一周票房就突破300萬令吉（約590萬港幣），創下馬來西亞影史最賣座本土中文恐怖片紀錄！電影以民俗禁忌降頭術為故事靈感，但《蠱降》唔止係單純驚悚片，更展現人性點樣貪婪到極致。
新片講述泰國記者Fon追查一宗校園慘案時，意外揭發地產商同黑巫師勾結，利用降頭逼害村民賣地；與此同時多名網紅因風流債遭邪術索命，釀離奇傷亡。
片中演員包括以GL劇《愛情設計》成名嘅泰國新星Kao，今次佢一反過往甜美形象，出演正義凜然、為真相不惜一切嘅泰國記者，更係佢首次以全英文演出。而黑哥於片中扮演一名泰國華僑降頭師，戲中要挑戰大量泰文同國語對白，更為演好角色親身拜見真正降頭師傅。
而曾參演《小孩不笨》嘅新加坡資深男星李國煌，今次就化身為冷血無情地產商，不惜動用禁忌黑巫術奪取土地，角色陰狠狡詐，同過往幽默感親民角色大有反差。而連續四年入選「世界百大美女」的馬來西亞女星黃詩棋就扮演一名網紅，預告可見佢不幸中降，佢仲指鄗片非常恐怖，拍攝時更戴佛牌自我保護。
