王嘉爾 第二次個人世界巡迴演唱會進行得如火如荼，過去一個月Jackson已征服北美同拉丁美洲合共5個國家10座城巿，屢創歷史性突破。
Jackson喺2023年成為首位喺紐約Barclays Center開騷並全場滿座嘅華人歌手；早前時隔三年重返該場館開騷，依舊火速爆滿、座無虛席。Jackson喺拉美市場嘅表現同樣亮眼，墨西哥城嘅演出入場人數高達約2萬人，熱烈氛圍可見一斑。呢次Jackson更親手寫下「首位登陸里約熱內盧開個唱的亞洲藝人」嘅歷史新一頁為華人爭光，創下當地演出新紀錄。
經過一輪穿梭各地嘅高強度演出後，Jackson就表示要先返屋企好好陪伴家人，要同父母享受美食、睇電影、一齊按摩以及為佢哋下廚。不過Jackson繼續保持專業態度，即使休息都會鍛鍊操肌，兼為下一張專輯做好準備。
今次巡演去年10月喺泰國曼谷開始，目前已完成16站。Jackson用音樂逐步開拓屬於自己嘅世界版圖，帶領樂迷走入呢場關於內在探索同自我對話嘅宇宙。Jackson接落嚟就會回歸亞洲強攻各大城巿，送上非一般嘅視聽盛宴！