黃浩然與杜小喬首度合作，將於7月與趙伊禕、黃慶堯及文佐匡演出由日本暢銷漫畫改編而成嘅舞台劇《蝦子餅得了憂鬱症》。
劇中黃浩然飾演典型社畜，因為背負家庭重擔，加上失業而患上憂鬱症，而杜小喬則飾演被丈夫寵愛嘅漫畫家妻子，故事背景設定於壓力指數爆煲嘅香港，探討兩夫妻如何喺困境中陪伴、溝通與自救。
講到喺現實中會點處理壓力？黃浩然坦言太太曾經係佢嘅出氣袋：「以前面對好大壓力，返到屋企會呆坐喺梳化，望住電視Loop新聞，而發脾氣就一定係向身邊嗰個。」佢指曾經因為情緒問題推掉劇《張保仔》，推掉演出後覺得鬆咗口氣，亦學識要休息，所以而家佢會透過運動、打坐、以及同太太分享感受嚟疏導壓力。
杜小喬表示自己單身時，如果壓力大又冇人陪伴，就會一個人去散步，直到遇到男友譚永浩後，對方就成為自己壓力嘅紓發出口，會同對方傾訴自己嘅苦惱，又會傾下大家兄觀點。
黃浩然指今次演出會保留部分原著漫畫元素，同時亦會貼近香港人「壓力爆煲」嘅情況，佢又指由於導演陳飛歷曾患憂鬱症，所以對方會將自身嘅故事，與外界對憂鬱症嘅誤解融入劇中。而文佐匡今次將飾演二人於劇中所飼養嘅蜥蜴，同時亦為劇中「說書人」，帶出普羅大眾對憂鬱症嘅睇法。
