香港電影資料館成立25周年，將推出3輯「星級影談」系列節目。首輯節目將放映囊括金像獎、金馬奬、金雞獎嘅導演 陳可辛 親自選出嘅4部代表作，以及兩部對佢影響深遠嘅荷里活經典，作品將於5月23日同24日喺資料館電影院放映，佢並會出席由影評人登徒主持嘅映前或映後談，同觀眾分享佢跨越文化同年代嘅電影世界。
陳可辛自80年代踏足影壇，1991年執導首部作品《雙城故事》，就令 曾志偉 榮獲香港電影金像獎最佳男主角，從此奠定陳可辛嘅一線導演地位。而佢參與創立嘅「電影人製作有限公司」，自90年代開始製作多部城市喜劇，其中《甜蜜蜜》就獲得9項香港電影金像獎殊榮。
其後陳可辛曾遠赴荷里活執導，又同其他亞洲導演合作製作多部高質素電影。2005年開始進軍內地，令唔少作品成功將商業同電影藝術結合。陳可辛嘅作品緊扣文藝情懷，亦兼顧香港人嘅獨特視角，處處流露中西文化交融特質。
呢次選映嘅6部電影分別組成三對放映組合。第一組有兩部跨時代愛情經典：《甜蜜蜜》、《北非諜影》。第二組選映電影係陳可辛執導嘅《中國合伙人》以及佢同李志毅聯合導演嘅《風塵三俠》。第三組選映電影就以戰爭做背景，分別係陳可辛執導嘅《投名狀》以及路易邁士東執導嘅《西線無戰事》。
資料館電影院亦會喺6月中放映陳可辛執導嘅《如果‧愛》，電影講述周迅同金城武飾演嘅電影明星，以及張學友飾演嘅電影導演喺拍攝電影期間，戲裏戲外嘅複雜關係。電影免費放映，須憑票入場。免費放映當日設少量現場名額，觀眾可於放映前45分鐘到資料館地下大堂排隊等候領取門票。每人限取一張，先到先得，額滿即止。
