《中年好聲音4》18強正式誕生，莫家淦、尹景順、鄭家聲、陳旭培、吳亦偉、鄭仲豪、范子睿、雷小雷、姚兵、周志康、許美琪、馬浩宜、科亞高巴、可嵐、許雲妮、尤淑情、蔡宓婕同卓猷燕齊齊大變身，著上黑色華麗晚裝拍攝宣傳片。
女士有deep v有美腿，男士就有周志康同陳旭培負責騷胸肌，不過包得密密實實嘅莫家淦就似乎對兩位戰友嘅胸肌有啲意見，仲踢爆旭培嘅胸肌線條係靠化妝師加工而來。
能夠打入18強，當然好開心，但睇住戰友一個個被淘汰，難免會唔捨得，吳亦偉就話每次淘汰環節都好難過，而一旁嘅鄭仲豪同范子睿就搞笑話亦偉已經攞咗兩次MVP，應該要留條路俾其他人行。
今屆有好多選手遠渡重洋，經過幾個月嘅比賽，大家有唔少收穫，許美琪就話好驚訝出街有好多人認得自己，周志康就大讚香港人好有人情味，成日出街都有人同佢講加油，至於科亞高巴最大嘅收穫就係廣東話大躍進，尤其叻咗講食物名。
比賽過程屋企人嘅支持好緊要，尤淑情同蔡宓婕就分別點名多謝老公幫手照顧小朋友，令自己可以無後顧之憂。卓猷燕就話雖然自己冇老公，但父母好支持自己，不過可惜佢哋年紀大，所以唔太方便嚟香港睇比賽。