賴慰玲 帶同大仔Yaya一齊拍攝節目《AI時代未來實習生》，從小夢想當飛機師嘅Yaya更一嘗機師廣播嘅滋味，溫柔嘅聲線令媽媽好冧。
今次兩母子一齊拍攝，Yaya有機會到真實機艙體驗，Winki話囝囝好細個時已經對飛機有認知，又或者喺街上望到天空嘅飛機，佢會分辨到係咩型號同類型。知道囝囝有呢方面啲興趣，Winki同老公會帶Yaya去吓模擬駕駛嘅活動，又會去一啲飛機主題酒店，見到阿仔著起套機師服又幾型咁款。
Winki大仔今年已經8歲，首次面對鏡頭難免有啲緊張，好彩有媽媽嘅貼心引導，Winki話平日Yaya好鍾意講嘢，特別係表達自己嘅意見，佢覺得小朋友嘅想法係最簡單直接，有時自己會被阿仔嘅說話啟發。而今次係Winki兩母子首度拍攝，作為媽媽特別珍惜呢份感覺，更笑言第一次就好似最後一次咁不捨。
