今個星期繼續由 王鎮泉 Jeoffrey 為觀眾送上電影資訊。「影人Talk」邀請到真人騷電影《BILLIE EILISH - HIT ME HARD AND SOFT 巡迴演唱會（3D現場版）》嘅主角，美國小天后Billie Eilish分享兼一齊欣賞電影花絮。
《BILLIE EILISH - HIT ME HARD AND SOFT 巡迴演唱會（3D現場版）》，捕捉咗座無虛席嘅世界巡迴演唱會珍貴畫面，將嶄新嘅演唱會體驗搬上大銀幕，令呢位享負盛名且成就非凡嘅當代巨星盡顯風采。
Billie Eilish同金像名導占士金馬倫，聽落去好似毫無關連咁，但最近佢哋就聯手執導Billie自己套演唱會3D電影，聽聞背後促成呢件事嘅正正係Billie嘅影星媽媽Maggie Baird，因為佢同占士都係素食推動者，因而兩人成為咗老友。而今次呢個演唱會，占士仲動用到連阿凡達都無用過嘅3D攝影機拍攝，等歌迷有十足嘅沉浸式體驗。
喺演唱會上Billie開場獻唱時，先用鏡頭自拍完美捕捉自己同觀眾熱情一面，然後再面向鏡頭吹氣，畫面引爆熱刺感覺，Billie話每逢巡演佢都會自拍，因為咁先喺Billie嘅攝影機，拍攝到自己同歌迷，再直播到舞台大銀幕上，營造臨場感，每場騷呢個鏡頭都係Billie最鍾意之一，特別係向鏡頭噴氣一幕。
巨星登場，全場歌迷會以燈海嚟呼應，Billie見到呢個情景雖然好開心，但某程度都會覺得燈海有時好似築起一幅牆，令佢睇唔清歌迷嘅模樣，不過佢明白到現今世代同手機共存係一種生活方式，所有嘢都會用手機拍低，自己都會拍日常生活，開心歌迷們為佢紀錄咗演唱會嘅一切。
本周票房龍虎榜截至5月6號中午，第1位《寒戰1994》，第2位《穿Prada的惡魔2》，第3位《米高積遜》。
