陳曉東Daniel 將於六月舉行紅館個唱，近日密鑼緊鼓進行排練，但日前東東同排舞師練舞期間，就不慎拉傷膝蓋筋骨，一度痛到要踎低，即刻終止排練，事後東東表示好瘀﹗無面見人。為咗快啲好返，東東不敢怠慢，立刻接受針灸治療同敷藥，仲喺社交平台透露傷勢，表示自己So far so good，雖然受傷，又不忘Po出多張自己受傷嘅Chok相。
東東除咗忙於籌備個唱，日前又為自己嘅黑膠唱片舉行蓋掌印簽名會，吸引大批粉絲捧場，東東嘅太太亦特登現身支持兼幫佢拍片紀錄。首次舉行蓋掌印簽名會，東東心情興奮，一邊左手印上顏料蓋印、一邊右手簽名，雙手並用加快速度滿足歌迷。
因為腳傷關係，東東話佢要休養幾日，希望以最好嘅狀態迎接演唱會，至於歌單嘅編排，東東話唱一啲歌迷比較熟悉嘅歌曲，仲會唱一啲初出道好少唱嘅歌，熟佢嘅歌迷就一定會識，唔熟嘅就當重新介紹。
