81歲李家鼎爆大仔李泳漢隱瞞前妻施明死訊，以照顧施明開支為藉口，苛索無度，加上李泳漢指責父親同細佬李泳豪唔肯負擔喪禮費用，導致父子正式決裂。鼎爺之前一直覺得家醜唔想外揚，近日忍無可忍接受訪問公開同泳漢語音對話同電話錄音，披露泳漢貪錢兼大話連篇真面目，同81歲老父親不停苛索金錢，鼎爺講到激動處仲泣不成聲，聞者心噏。
鼎爺公開語音對話內容包括泳漢向鼎爺索200萬定期，「你有冇搞x錯，嗰日同你兜口兜面講點樣做，5萬蚊一個月，你話你定期8月開始，你有200萬點解畀唔到，又唔係要你一次過畀。我即日已經打咗俾Agent，認x咗張單（保險單），簽x咗喇喎」、泳漢對住年邁父親，態度十分囂張惡劣，言談間不斷爆粗，「我唔係嗰日認咗張單（保單），我使乜嗰日唔俾你走，坐低認咗條數」。
鼎爺公布上年錄低嘅通話內容，泳漢話頂爺要「趕絕」自己，當鼎爺稱自己不獲續約，預期工作量大減，恐無能力再供養大仔一家，泳漢聽完即刻發爛渣，指責父親出「屎橋」，言談間意指父親應份要供養孫兒，幫自己還債同找卡數。
鼎爺好聲好氣勸大仔搵份工，估唔到泳漢不務正業，仲滿口歪理話自己高中畢業學歷都冇，做sales都冇人請，最後仲威脅鼎爺話「而家屋契（九龍塘碧涵別墅）喺我手，我掟x咗去銀行，你吹呀！我仲有好多嘢玩」，對照返當日喺施明靈堂外，泳漢「孝子」形象，大話連篇嘅泳漢今次真係唔知點兜好。
