大S 徐熙媛 於2025年病逝，小S 徐熙娣 經過一年療傷終於正式復工，日前佢為主持嘅節目《小姐不熙娣》重返母校華岡藝校，仲約埋同屬「花崗七仙女」嘅同學 柳翰雅 同行，二人一齊回憶昔日時光，亦感嘆造化弄人。
從節目組釋出嘅片段中，見到小S、阿雅著上校服返母校，兩人坐喺課室翻睇畢業紀念冊，睇睇下小S突然眼濕濕，原來佢睇到大S同另一位已故同學 大炳 嘅相有感而發：「人生還有什麼意義，不用刻意追求什麼很偉大，就每天好好過好就好。」
節目拍攝後小S喺IG上載30年前嘅舊照，相中大小S同阿雅著住校服，正值青春年華嘅三人笑容燦爛，而另一張相小S同阿雅擺出同30年前舊照同樣嘅pose，仲特登空出大S嘅位，小S寫到「那時候的我們真的好可愛，好想妳喔珊～每分每秒。」對家姐嘅思念令人鼻酸。
更催淚嘅係阿雅為咗唔令大S缺席，佢特登用AI生成三人合照，令照片不再留有空位，阿雅話喺節目拍攝前都返過一次母校，諗返起青春為回憶，瞬間淚崩，「這次和熙娣一起回去，感受更深刻和豐富。沒感覺已經過了30年，也沒料到有一個人會不在了….」阿雅話人生無常，大家應該將每一日都當最後一日過，人生先至會無悔。
