《中年好聲音4》18 強嘅舞台，今個星期日母親節特別上演「人生之歌」上半場，一眾選手會分為兩個賽道出戰，爭取分數晉級。每位參賽者所揀選嘅歌曲都盛載住佢哋背後嘅感人故事，搞到成個錄影廠彌漫住濃烈嘅洋蔥味，一班評審們都感動到變晒喊包。
當中尹景順演繹蕭煌奇嘅《阿嬤的話》，唔止全場動容，連主持車婉婉都感動到爆水煲，事後訪問仲眼腫鼻紅咁大讚景順嘅歌聲觸動人心。肥媽就搞笑話如果早知今集會喊到咁慘，就應該慳返啲化妝品唔化妝了。
今集好多參賽者嘅親友都有嚟支持，令現場氣氛有笑有淚，莫家淦媽媽再次拉埋姊妹嚟撐場，中聲師兄趙浚承都以過來人身份為好友打氣，佢話因為自己經歷過成個過程，所以想過嚟幫好兄弟打打氣。
