80至90年代著名填詞人原名陸謙遊嘅因葵，喺5月7號傳出離世消息，終年60歲。因葵生前有「太極御用填詞人」之稱，太極亦喺社交平台發文悼念「兄弟，一路好走。喺天堂同Gary Tong夾住band先，我哋喺下面繼續聽你哋嘅音樂。永遠懷念你。」周啟生同樣發文悼念亡友。
因葵生前最後一個訪問，就係兩個多月前喺《一周星星》中分享同太極嘅合作，當中更談及自己嘅身體狀況，而佢寫畀太極40周年演唱會嘅歌曲《回憶殺》就成為佢嘅遺作。因葵喺訪問中提到自己近日身體狀況不太好，但都趕得及寫新歌比太極，仲勉勵大家要活在當下。」
myTV SUPER重溫《一周星星》精彩內容
因葵一生創作無數金曲，合作嘅歌手包括張國榮、陳百強同四大天王等，當中佢為鄭秀文填詞嘅作品《插曲》，奪得1999年度十大勁歌金曲頒獎典禮「金曲金獎」。因葵除咗情感歌曲觸動人心，佢為鄭少秋所寫嘅《香港料理》，近年亦被網民捧為「網絡神曲」。
因葵曾經喺1997年走出幕前，組成樂隊「余力機構」。人生首支創作歌曲《紅色跑車》更令佢一炮而紅，因葵亦喺《一周星星》嘅訪問中，分享呢首代表作嘅意思。
而喺節目《一周星星》中，雷有輝亦有講到自己同葵叔原來中學時代已經係同班同學，仲話葵叔當年已經好前衛，好有自己嘅性格，雖然好多同學唔鍾意，但自己就同對方一拍即合。
