由麥明詩、林溥來主持嘅全新節目《AI時代未來實習生》5月9號將會首播，三位有份參與呢個節目嘅星級父母陳展鵬、陳山聰同賴慰玲，呢日齊齊現身記招，分享佢哋仔女喺節目中實習唔同職業嘅感受，佢哋仲話呢個節目，唔單止令佢哋嘅小朋友眼界大開，亦帶比佢哋一次難忘嘅體驗。
Winki話囝囝Yaya可以如願實習做飛機師，相信呢個經驗兩母子都會畢生難忘。展鵬就話小豬比咁細個就有機會追夢，真係好幸福，而山聰就預告節目中有個大彩蛋一定會令大家感動落淚。
產後重返娘家主持節目嘅Louisa，呢次首度同Patrick Sir 一齊合作，佢哋兩個都話主持呢個節目，令佢哋喺規劃小朋友將來呢方面有好大嘅啟發，最緊要就係要賺多啲錢，因為小朋友嘅夢想一啲都唔平，不過自己賺錢之餘都會努力增值自己。
