香港本土漫畫當年極為流行吸引，不論係7、80年代嘅《龍虎門》、《牛仔》、《中華英雄》到90年代嘅《古惑仔》、《風雲》，當年都紅遍東亞，更曾動畫甚至劇集同電影化，而當中曾大力推動漫畫發展嘅幕後推手 施仁毅 ，近日接受網上頻道SpotiTalk訪問時，就大爆《風雲》原作者 馬榮成嘅最新動向，更提到雖然《風雲》漫畫版早已完結多年，但馬榮成仍有一個未圓電影夢，希望親自促成《風雲》電影系列第三部曲，更屬意當年締造經典嘅主角 郭富城 同 鄭伊健 再次攜手演出。
施仁毅於節目中接受 渾水 訪問時，公開分享同馬榮成嘅討論內容，佢指馬榮成曾親口表示：「想拍第三部。」
佢認為1998年首部《風雲：雄霸天下》早已成為公認經典，雖然事隔十年推出嘅第二部《風雲II》評價不一，但馬榮成仍希望可以完整完成「風雲電影三部曲」。雖然兩位主角 郭富城 同 鄭伊健 已年約60歲，不過馬榮成仍認為佢哋係飾演聶風同步驚雲嘅最佳人選，希望可以為呢奪港漫經典畫上一個圓滿句號。
施仁毅認為呢個諗法，係馬榮成出於對完美嘅追求同創作者嘅執著，唔希望留下遺憾。雖然外界對兩位主角嘅年紀同近年電影投資回報有唔同意見，不過對馬榮成嚟講，呢個係佢人生規劃中「完美人生」嘅一部分。佢又話雖然目前進度緩慢，但呢項計劃一直喺馬榮成嘅腦海中。
而早於《風雲II》中出演「絕地」嘅古天樂，佢旗下嘅電影公司就曾於2016同2019年多次公開宣布將開拍《風雲III》，當時更稱會由馬榮成親自擔任導演。2019年影視展曾有消息指出，古天樂將於《風雲III》飾演武學宗師「無名」。海報中亦出現過漫畫後期最強反派「帝釋天」，當時曾引發影迷同漫迷熱議。不過由於版權、演員檔期同疫情等因素，該計劃之後暫未更新。
