出道20年嘅農夫 三場《全香港最好笑演唱會》星期五晚正式開鑼，整晚7千名觀眾笑聲不絕，多位圈中人員好似 容祖兒、俞琤、丁子高、張紋嘉、Lolly Talk、JFFT等都有到場支持。
演唱會一開場，兩人就只露出頭部由耕地佈置中「現身」引爆首個笑彈，陸永仲抵死指：「全香港最好笑嘅演唱會吖嘛，最好笑係呢度㗎啦，你哋張飛咁平，我哋個升降台係升到呢度㗎咋。」而C君就接力自嘲：「其實係好事嚟，因為我下身唔係好好睇，我老婆都唔睇㗎。」
全場爆笑聲未落，佢哋隨即由升降台飛彈而出，氣氛瞬間被燃點，兩人亦開始由多首歌曲《同伴》、《冇你就冇我》、《心跳回憶》、《跟隊唔該》、《全民皆估》、《娛樂圈殺人事件》、《韓國勁舞權》、《中佬先係寶》、《Dream Girl》、《難得咁人齊》串連而成嘅Hip Hop Medley。
佢哋又請嚟香港Hip Hop界重量級代表Novel Fergus同Hip Hop詩人PetPet Shawn，加上玄學天后麥玲玲驚喜化身「Hip Hop Queen」，玲玲一出現全場瞬時進入狂歡狀態，high爆全場。
農夫又宣布去年已成立公司「農作天下」，呢日上演7千人一齊參與嘅「剪綵開將」。佢哋更笑指準備邀請古天樂、梁朝偉、周潤發簽約加盟，C君又一本正經指：「不過仲未去傾過。」，之後又帶領觀眾齊齊為新公司切燒豬、剪綵。
佢哋又宣布10月會有新搞作，送予所有已婚人士，而 張繼聰 即以「人夫集團」身份驚喜現身，與農夫換上西裝合唱《我連婚都夠膽結》。到唱《學海無涯》時，Twins驚喜於舞台出現，與農夫合唱《士多啤梨蘋果橙》，陸永仲向新婚嘅阿Sa連聲恭喜，阿Sa笑住答：「多謝多謝....我哋頭先喺台下面睇好high呀，好好笑！」，兩人又感謝阿嬌專程飛返香港撐場，演唱會最後喺全場合唱《舉高隻手》後圓滿落幕。
