網騙個案越嚟越多，唔少藝人都成為騙徒利用嘅一部分，佢哋會以藝人嘅照片，開設假嘅社交平台專頁，從而向藝人嘅fans埋手。繼有人假冒「劉德華」呃走粉絲成副身家後，又有騙徒利用 發哥周潤發 嘅照片捏造假帳號向粉絲埋手，不過今次呢位網民相當機靈，唔只一早就識破騙徒手法，仲將整場對話截圖放到網上警世，而對話內容更相當爆笑，連 Coffee林芊妤 都有追Post，仲笑到嘈醒埋個女！
最初該網民發現自己同「周潤發」成為Facebook好友後，便私訊對方fact check一下真偽，點知呢位「周潤發」就話想藉呢個機會多謝呢位網友多年嚟嘅支持，仲叫對方講下自己鍾意咗周潤發幾多年，期間騙徒問到網民鍾意睇佢邊套電影時，網民專登講成發哥並無演出過、由日本漫畫改編而成嘅電影《賭博默示錄》，但騙徒並未發現問題，之後仲話自己拍咗套叫《冷戰3》嘅動作驚悚片就上映，但send出嚟嘅海報就係最近上映嘅《寒戰1994》，睇到呢度已經有唔少網民留言話笑到肚痛。
故事嘅後續就係騙徒問網民拎咗電話，兩人轉以WhatsApp對話，經過騙徒一輪「追求」後，就開始想利用網民嘅好感呃錢，騙徒先賣慘話自己患病入咗醫院，指自己腎臟出現問題要做移植手術，仲send咗張發哥着住病人服喺醫院嘅合成照畀網民，又話因為自己早前捐錢畀孤兒院，令到戶口被凍結，畀唔到錢做手術，睇到呢度大家都知騙徒想做咩啦！
由於網民同呢位騙徒嘅對話超爆笑，吸引到3萬幾人轉發，其中藝人Coffee林芊妤亦係追PO者之一，佢仲留言話：「我笑到流眼水呀😂😂😂😂😂😂😂 會想飲我的血嗎😂😂😂😂痴線 嘈醒左(咗)個女」。
