周國賢 推出新歌《未完 待續》，Endy今次更一手包辦整首歌嘅曲、詞、編所有工作，落足心機。Endy話新歌創作靈感源自佢親眼目睹好友嘅一段感情事：「佢哋明明好愛對方，但又好似成日互相傷害，最後分開咗，兩個人其實都放唔低。」
Endy話一啲人好很珍惜嘅事物，表面好似「完結」，但只要夠相信呢件事就會一直存放心中、於夢中重演，故事永遠「未完」。佢話：「成日有人話要『放下』，親人或者好友離開咗，就勸人唔好成日諗起。但其實只要一直有人掛住佢哋，佢哋就好似一直存在喺我哋生活入面，放低未必係我想要嘅，『待續』先係。」
佢又分享創作過程係「寫歌玩死自己」嘅多年習慣：「難嘅位唔係作曲填詞編曲呢幾件事，而係有時對得首歌太近，反而睇唔到邊啲好、邊啲唔好。我哋Comment人哋啲嘢容易好多，但自己做有時就睇唔到。」
Endy話：「今次呢首歌Tempo一時快一時慢，Chorus前又整段結他Solo俾自己，總之好似永遠都唔可以正正經經寫首簡單啲嘅歌咁，好鍾意玩死自己呀！哈哈。」
佢仲話MV拍攝過程非常辛苦：「天光前開機，捕捉嗰個即將天光嘅藍色，跟住潮漲半個身濕晒，然後再吹多一個鐘海風繼續拍，下晝就暴曬！好耐冇拍一個咁甘嘅MV啦。」不過佢就對MV成品猶如到外地拍攝一樣非常滿足
拍攝期間一行人遇到一位女士孭着一個大背囊上山，原來佢每日都會行上山頂餵飼兩隻流狼狗，睇住狗仔食完就走，而兩隻狗仔每日都會等佢。Endy覺得呢件事非常浪漫：「不說出口的約定，真係好似《小王子》咁講，『假如你馴養我，我們就彼此需要』。」