倪晨曦自發舉行圓夢活動 為病童達成心願感榮幸

倪晨曦 一直經營自己嘅網上影片頻道，仲由去年開始計劃做一個特別有意義嘅圓夢活動，為身體有缺憾嘅兒童、青少年達成夢想，呢段時間已陸續進行中。呢日Elva出席活動時就分享，自己好榮幸可以做到呢件事，大家願意俾佢幫忙完成夢想。

Elva指參與活動嘅其中一位小朋友嘅夢想係坐飛機，所以佢哋當時就飛咗去三亞玩，雖然對方冇辦法講嘢，但當知道可以夢想成真時都笑得好開心。另一位參加者嘅夢想就係著婚紗，所以Elva就安排咗一套婚紗俾佢，亦幫對方媽媽安排咗一套衫令呢對母女可以圓夢。

一眨眼又到母親節，Elva都好期待收到三個小朋友送嘅心意！Elva話小朋友而家返緊幼稚園，所以學到咩都會返屋企分享，而佢哋已經學咗一首歌，仲叫媽咪到時記得聽！不過講到慶祝方式，佢哋就冇一個特定嘅慶祝方式，最多食餐飯。