周嘉洛母親節向滕麗名送花 意外令媽咪豪宅門庭曝光

周嘉洛 平時鬼鬼馬馬，不過內心就係一名窩心暖男，剛同 張振朗 一齊參加完體能耐力賽嘅佢喺母親節正日，除咗向自己媽咪表達愛意，仲專登送花畀另一位日對夜對嘅「媽咪」《愛．回家之開心速遞》中嘅熊尚善 滕麗名 ，一身運動裝束嘅嘉洛，拎住紥花喺阿滕豪宅門外出現，冧晒嘅阿滕仲拍片曬命，又寫上「這樣的孩子有誰不愛。」

嘉洛嘅孝心同時令阿滕豪宅嘅門庭曝光，早前阿滕曾分享一條貓奴生活短片，意外令大家能一睹複式別墅豪宅內部設計。阿滕嘅豪宅大庭嘅落地玻璃坐擁青翠山景，室內設計簡約富格調，置身其中能夠將工作忙碌拋於腦後。