農夫 紅館演唱會第二場獲江美儀、高海寧、湯令山同Tyson Yoshi等好友入場支持。 MC張天賦 更以神秘嘉賓身份現身舞台，與農夫合唱《學海無涯》，佢全程無睇提詞機，一字不漏完整Rap出成首歌，連農夫都露出難以置信嘅表情。陸永話： 「大家有無留意？我真係未見過有嘉賓可以Rap咁多，佢要求唔要提詞機。」
MC就自爆：「我真係細細個聽你哋啲歌大㗎！我記得嗰時仲係小學，唔用正途去下載音樂，放入MP3入面聽㗎！你哋係我人生list上面其中一組人，我好希望可以嚟到你哋演唱會做嘉賓。係人都知，我做任何演唱會最緊要一定要提詞機，但今日我覺得你哋啲歌，如果我背唔到，就唔配上嚟做嘉賓！真㗎！所以我今日真係好開心，好少我做嘉賓係冇壓力㗎，呢度真係好歡天喜地。」
尾聲時，農夫再度殺大家一個措手不及，喺台上舉行「開張大典」，佢哋向觀眾介紹：「你哋有冇發覺？農作天下，點解有天下兩個字？So fa So Cool，又有個Cool字？我哋公司之前未公開做過開張大典，好似有啲嘢未完成，係今日咁開心嘅時刻，不如我哋全場一齊做一個開張儀式好唔好？有請我哋公司國際榮譽霸道總裁！」舞台大門打開， 古天樂 就步進舞台。
C君話：「拯救一間公司可能要白武士，但投資一間公司就要黑武士。多謝古老闆！老闆你驚唔驚我哋叫你嚟投資，將會係一個世紀大騙局？」古天樂就回應話：「多多支持，多多指教，今日香港需要開心歡樂！」繼而三人於台上一邊切豬，一邊話「風生水起，笑口常開。日後業務好唔好就唔知，一切交畀天命。」之後農夫打動全場起哄要古天樂開金口，而古仔喺農夫「半推半就」之下，戴起耳機同全場合唱《天命最高》。
