模特兒出身嘅盧慧敏Amy Lo 最近由銀幕跳上舞台，於樂壇發展非常亮麗，唔止於樂壇頒獎禮捧走多個女新人獎項，早前更成為惟一香港藝人獲邀於ComplexCon演出，
而佢推出嘅首張EP 《Unveilings》成績一樣突出，早前Amy就舉行EP發佈派對，多位圈中人好似導演梁禮彥、許恩怡、林熙彤、陳健安、梁釗峰同新人 藍奕持等都現身捧場。Amy更指見到台下親友同Fans，感覺有如舉行婚禮一樣。 Amy以《白牆》掀起音樂會序幕，一步一步踏上樓梯，舞台上邊行邊唱到以唔同燈飾布置嘅位置，之後再演唱《藍染》、《綠縈》、《黑繩》、《Red Fleg》同《粉月》等作品，以及兩首cover歌曲。
完騷後Amy情緒仍然高漲：「心情好複雜，推出第一隻EP同埋第一場個人音樂會，呢個情感真係好濃郁，我仲消化緊。喺台上見到好多面孔，由我開始做Model，每日陪我跑10個試鏡嘅同事，亦有以前嘅朋友，好開心！」
「我家族唔算大，不過好多親戚都有嚟，媽咪喺哥斯達黎加嚟唔到，但好多熟朋友，同埋由細睇到我大嘅Auntie都嚟咗，好似婚禮，我搞咗第一個我同音樂嘅婚禮！」Amy話：「好神奇，我第一次台上講『Te amo 』（我愛你西班牙語）係今年頒獎禮，佢哋今晚好似回應返我嘅說話。」
Amy表示呢次演出「唔夠喉」，至於係咪希望於更大舞台開個人演唱會，Amy瞪大眼笑說：「其實我好想，但亦都好珍惜碎步嘅福氣，我覺得經歷係一步一步累積，想慢慢收集養份。我唔係幾適合一步登天嘅運氣，碎步可以體驗同埋經歷多啲，學到更多，用時間浸出嚟。」
EP收錄一系列以顏色為主題歌曲，但封面就以黑色同刻意朦朧，Amy解釋：「每個人有好多面向，未必係一眼就望到，其實黑色入面可以有好多顏色，人可以有好多面向、心情、情緒、經歷。呢張唱片用黑色，亦都真係我最鍾意嘅顏色，去包住入面好多唔同嘅Amy。刻意選擇唔清楚咁呈現，未必用肉眼睇嘅就係最清楚，可能唔清楚先至係嗰樣嘢嘅本質。」
Amy又話會將自己第一張唱片會送予媽咪：「我最想送第一張唱片俾媽咪，雖然佢應該唔係好知啲歌講乜，但我會盡努力翻譯俾佢聽。」