周家怡 金燕玲 陳湛文 楊雅文 同 張迪文參演；陳心遙監製、新晉導演胡翠兒執導嘅新片《媽樣年華》，日前舉行慈善優先場，邀請多位為家庭出心出力嘅主婦，同家人一齊入場欣賞。
而扮演母子嘅周家怡同張迪文久未碰面，呢日一見面就擁抱問好，Jayden更準備花束送予「媽媽」家怡，非常溫馨。
《媽樣年華》講述家庭主婦於家庭同自我之間勇敢追夢嘅故事，家怡呢位追夢母親，同Jayden呢個「媽寶」嘅母子對手戲備受期待。家怡分享時仲鼓勵每一位媽媽勇敢追夢，Jayden就寄語觀眾任何年齡、任何情況，都可以追求自己想做嘅事。
監製陳心遙亦現場宣布，電影計劃下半年上映，家怡非常興奮話：「呢套戲大家都放咗好多心血。最重要係我覺得呢部電影適合所有人睇，俾大家見到導演拍呢部戲嘅初衷，就係想表達媽媽當初選擇家庭時所放棄嘅野，期待上映後有更多媽媽可以睇到。」
家怡提到戲中需要跳鋼管舞非常深刻：「開拍前準備咗三個月，但正式訓練可能只得一個月，因為中途經歷骨裂，真係好辛苦，需要好大力氣。其實以前我完全唔了解鋼管舞，覺得拍嘅時候扭兩吓就得，結果完全唔係。了解後先發現鋼管舞根本係武術，需要好強嘅核心肌群同肌肉，要訓練過先可以做到。」
同家怡扮圓母子嘅Jayden回憶拍攝過程時話：「家怡好友善，好疼錫團隊所有演員。因為始終好少經驗拍電影，所以有前輩家怡同燕玲姐照顧都係非常開心嘅一件事。」