谷德昭 嘅二家組、資深電影人 林谷薇麗Linda 5月2日離世，終年73歲。傳媒報道離世消息後，谷德昭11號凌晨發長文悼念胞姊，坦言自己受對方嘅影響，而對電影產生興趣，從而投身電影事業。
谷德昭於文中大讚二家姐讀書叻，畢業於香港大學，隨後加入麗的電視做助理編導，Linda非常享受自己嘅工作，人緣不俗嘅佢仲結交咗大批朋友。谷德昭細個時，Linda已經喺新藝城、德寶工等電影公司工作，當時對方會帶好多未上映嘅電影錄影帶返屋企，亦係呢個時候令谷德昭對電影產生興趣。
後來當谷德昭讀完書返港，憑住二家姐嘅關係順利加入電影圈，雖然最初Linda都有擔心呢個細佬唔啱做，但後來見佢做得唔錯，又帶到唔少歡笑畀觀眾，令二家姐相當驕傲。
除咗照顧自己嘅家庭外，谷德昭指二家姐亦非常照顧自己嘅兄弟姊妹，除咗經常親手下廚請食飯外，二家姐仲係咁多位家姐之中，包山東水餃最叻，同時對食材亦相當講究。
由於谷德昭與Linda同一生肖，故兩姊弟相當好傾，年紀越大佢哋就越親近，每個星期都會見面兩、三次，每晚都會通過WhatsApp傾吓電影、世界大事同八卦，谷德昭表示喺Linda臨走前嗰晚，佢哋都仲有通短訊。
谷德昭憶述二家姐曾經講過，如果有一日佢要離開呢個世界，最好就係不知不覺咁，於家中睡夢中離去，谷德昭寫道：「老二啊，你離開咗，我失去咗一個二家姐、一個好老師、一個好朋友。我哋好掛住你！我哋一家人都好懷念你帶俾我哋嘅好時光、好回憶。我哋會繼續好好哋互相照顧，亦會將你樂於幫助別人嘅心 Pay It Forward 。」
帖文末端，谷德昭表示如果有下世，希望可以同Linda繼續做姊弟：「或者下次由我做哥哥，可以照顧你！Dear sis, I miss you very very very much！」
多位圈中人陳慧琳、鄭秀文、容祖兒、劉浩龍、張繼聰、黃浩然等都有留言，其中吳君如留言表示：「Linda 望住你嘅眼神，佢仲當你係一個細佬仔好緊張你！佢簡直𡃶到你燶❤️Linda 嘅人生使命已經超班完成。We all miss her so much」
而谷德昭嘅女友林子萱Kiki亦貼出與Linda嘅黑白合照，並於帖文中分享對方叫佢食嘢嘅對話：「好唔好食呀？好好食呀。你咩都話好食架(㗎)？係愛呀嘛。有冇食哂啲嘢呀？有食哂呀💔Linda, thank you for being so capable so steady so wise, thank you for fighting along by my side, thank you for showing me the most loving way」
