《中年好聲音4》十八強呢日喺商場舉行一個見面會，大批支持者企勻商場各處，場面墟冚，18強把握機會走近粉絲，影合照及簽名答謝塞爆會場嘅粉絲，18強唱將輪流上台獻唱炒熱氣氛。
myTV SUPER重溫18強比賽歷程
除咗唱將們展現唱功之外，趙浚承同「CLS」成員李創偉 (Catry)、陳溢光 (Louis) 與善玥澄 (Shinnie)喺台上大曬歌喉助興，今次一眾唱將走出電視城，喺台上見證粉絲熱情，大家按捺不住內心興奮嘅心情，蔡宓婕話有啲受寵若驚，馬浩宜收到粉絲私訊亦好開心，有一齊傾吓偈，覺得粉絲鼓勵係佢哋好大嘅推動力。
周志康呢日獲大女Emma前嚟撐場，爸爸同鄭仲豪、陳旭培及鄭家聲圍埋做訪問時，主播許文軒笑問Emma支持邊個時，四位男士即露出燦爛笑容望向Emma，而Emma當然係揀爸爸，周志康都話呢次父母真係有睇過佢比賽，佢同家人關係拉近咗。
作為三孩之父嘅鄭仲豪，話啲小朋友好想嚟香港睇爸爸出戰，鄭仲豪希望入到決賽先帶小朋友嚟睇，對於殺入決賽，鄭仲豪都幾有信心。
《中年好聲音4》星期日晚 20:30 翡翠台