劇集《正義女神》大獲好評，劇組隨即釋出要拍攝前傳消息，近日77工作室終於正式親證消息，公開前傳《模範律師團》海報，配以文字介紹故事核心「有人追尋真相，有人編織真相。撕開法律縫隙，看見人心殺局。《正義女神》衍生篇《模範律師團》震撼揭幕」。
短短幾句，已經感受到故事嘅張力！《模範律師團》繼續由金牌監製鍾澍佳操刀，預計五月尾開拍，故事聚焦喺陳煒飾演嘅高淑樺成為高大狀嗰段發跡過程，以及佢如何為人母嘅神秘過往，以及揭曉高成彬生父之謎，填補角色留低嘅懸念。
劇集陣容方面，請到視帝羅嘉良時隔超過10年重返TVB，飾演曾因殺人被判無罪釋放嘅殺人大狀，有傳佢係惡魔少年高成彬嘅父親，故事講述案件謀殺辯護等複雜情節，另外仲有張曦雯、劉佩玥等加盟，精彩可期。
