真人騷《魔音女團》呢個星期進入成團階段，上星期16位練習生分成A、B、C、D隊，上演團隊考試日。而喺最新播出嘅一集，由宋宛穎擔任隊長嘅Team A 以及由倪樂琳擔任隊長嘅Team B成功晉級，而Team C同Team D就慘被淘汰。
成功入圍嘅兩隊心情相當興奮，齊齊大叫係「奇蹟」同「Magic」！開心還開心，鄧凱文就話：「係Magic，但係我都好驚，因為代表要繼續。」宋宛穎附和一句：「可能之後係地獄。」兩隊都話其實大家係估Team A 、Team B會輸，仲有人話如果佢哋贏就係奇蹟嘅發生。自認冷靜嘅宋宛穎忍唔住喊，因為呢段時間大家都好努力，宣布結果一刻真係好感動。至於勝出後做想做咩慶祝？八個女仔都話：「食宵夜！」
有人歡樂就有人愁，未能晉級嘅Team C、Team D 得悉賽果一刻忍唔住落淚。雖然輸咗場比賽，但係佢哋就赢得珍貴友情。莊子璇表示最開心係透過比賽認識到三位隊友，因為一開始大家都係彼此唔認識，經過呢段日子已經變成好好嘅朋友，自己會永遠記住呢段友情。
Hilary講到感觸時忍唔住落淚，坦言擔心自己講嘢太直率令大家唔開心，但係三位隊友完全冇介意。陳熙蕊仲話Hilary雖然講嘢直，但係為人好，有種被佢袋錢落袋嘅感覺。葉靖儀同Hilary一樣講到喊，覺得比賽令大家得到友誼，同埋自己嘅進步。
被淘汰嘅八位練習生即刻接受重考挑戰，勝出嘅四位可以復活重返魔音女團，所以大家一定要繼續Keep fighting！
