許紹雄愛女許惠菁（Charmaine）作客《流行都市》，啱啱7號度過29歲生日嘅Charmaine，因為爸爸嘅離開，今年原本冇諗住慶祝生日，但疼錫佢嘅媽咪同朋友，決定為佢準備生日驚喜及送暖。
Charmaine話生日前夕，媽咪安排佢嘅大學同學慶祝，當中家姐佘詩曼亦有出席。正日當天就有好友及高海寧、陳敏之及黎芷珊等現身，令佢感受到滿滿嘅愛，佢話一切盡在不言中。
Charmaine以往每年都有爸爸陪伴過生日，今年首次冇咗爸爸喺身邊，Charmaine直認內心仍然好掛住爸爸。正日當日早上，Charmaine匿埋喺廁所喊，又到爸爸房間，跟爸爸「訴心聲」，Charmaine一直唔敢重溫同爸爸以往嘅對話內容，當日忍唔住翻看，因為爸爸每年都同佢講生日快樂。
