五月天嘅世界巡迴演唱會北京站舉行得如火如荼，十二場嘅演唱會一眨眼已經將近尾聲。喺過去冇耐嘅第六場，五月天就邀請咗內地歌手周深做嘉賓，阿信更挑戰周深一首非常繞口嘅熱門歌《達拉崩吧》，二人互飆高音，炸爆全場。
第一次同五月天同台嘅周深，心情非常緊張，亦好感激五月天邀請自己。唱完第一首歌後，周深忍唔住飛撲攬攬阿信，同阿信有「最萌身高差」嘅佢仲大讚「阿信老師高大威猛」，又表示曾經喺上海睇過五月天演唱會，雖然當時落雨，但無阻「五迷老師」嘅熱情。
周深喺呢晚情緒高漲，仲不時唱到一半高叫「五迷老師」同大家互動，玩到連阿信都加入玩埋一份，叫返周深嘅Fans名「生米老師」。二人最後亦有解釋，呢段小遊戲嘅背後係因為提詞機突然壞咗，需要等工作人員維修。不過周深好似真係玩上頭，不停同台下五迷繼續互動，令阿信忍唔住同周深講，唱下首歌嘅時候唔好再突然用高音叫「五迷老師」，因為佢驚以後聽周深嘅歌，個腦會自動出現周深用招牌高音叫「五迷老師」。
